Masashi di pia ta un tecnica cu tabata conoci na Asia, Africa, Europa y e cultura Norte Americano. Den e cultura di India, Chino y Babilonia mas cu 5000 aña pasa, e arte duna masashi y primi cierto puntonan specifico di bo plantanan di pia tabata wordo considera un manera efectivo di relaciona cu otro hende y sanea nan. Den e civilisacion antiguo di Egipto, 2500 aña prome cu Cristo, despues cu e decifra e pinturanan riba e murayanan di e tumbanan di e dokternan di e tempo ey, tabata mas cu claro cu reflexologia tabata wordo practica door di nan. Na Grecia y Turkia, e filosofonan tabata papia di duna masashi na e pianan pa promove bienestar.

Awendia, e historia di reflexologia ta cuminsa entre 300 pa 700 aña despues di Cristo cu e indjannan nativo di Norte America. Den nan cultura nan ta enfatisa e uzo di un simpel masashi di pia pa evaluacion y sanacion. Durante e siglo 16, e masashi di pia a bira popular den e continente Europeo.

Kico ta Reflexologia di Pia?

Reflexologia di pia ta un arte di wak e pia manera un refleho di ful bo curpa. Reflexologia tambe ta e ciencia cu a origina for di e principio cu nos man y pianan tin varios punto di reflex cu ta relata na cada organo, glandula y partinan di bo curpa. Durante e sesion, tur e puntonan di reflex ta wordo stimula pa trece e curpa bek den e estado natural di balans.

Pakico e pianan?

Door cu nos ta constantemente para riba nos pianan, tur e particulanan pisa ta bay na nos pianan cu e forsa di gravedad. Cada pia tin mas of menos 7 mil salida di nervionan y hopi biaha e particulanan aki ta wordo cristalisa. Esaki ta blokea e salida di bo nervionan cu eventualmente ta causa stagnacion den e fluho di energia door di ful bo curpa.

 

Beneficionan

E beneficio mas importante di reflexologia ta cu e ta rebalansa bo sistema nervioso completo. Door di uza presion pa masashi e puntonan di reflex cu ta na e plantanan di bo pia, reflexologia ta reduci tension den bo curpa, e ta relaha bo pa un miho enfoke mental y e ta sanea na nivel di bo celnan.

Adicionalmente, bo ta ricibi un meditacion guia pa calma bo mente y induci un relahacion profundo.

Kico bo por spera di un sesion di Reflexologia?

Bo por spera di experiencia cielo na tera.

E plantanan di bo pia ta un area grandi cu ta hopi facil pa traha riba e puntonan di reflex. E unico cos cu mester hasi ta sinta (of drumi) comfortablemente, kita bo sapato y meanan. Reflexologia ta algo mas cu masashi.  E ta un sesion natural cu por trece balans na ful bo curpa. Esaki ta un manera exelente pa cuida bo curpa pa harmonisa bo sistema emotional completo, asisti bo den laga e emocionnan negativo acumula los den diferente partinan di bo curpa.

E efectonan di reflexologia ta acumulativo. Entre mas biaha bo ripiti e tratamento, mas beneficio bo ta ripara. E frecuencia di bo citanan ta wordo determina a base di bo necesidad individual. Tur sesion ta wordo duna cu e proposito pa reduci stress, relaha y trece e curpa bek den balans.

Recomendacion

Nos ta recomenda bo pa combina bo reflexologia cu un servicio di un baño di detoxificacion di pia of un masashi cu energia di ful curpa. Si bo kier experiencia algo completamente nobo, puntra pa e posibilidad pa bo tuma bo sesion di reflexologia den awa ta flota.