E ta tuma hopi confiansa

Awe mainta mi tabata sinta ta wak pafo y diripiente, den mi skina di wowo, mi ta wak un parha grandi. E la yama mi atencion, y mi a pone tur cos un banda pa mi busk'e den e shelo y wak e bon. Ta resulta di tabata un warawara, pero di berdad uno basta grandi.

Na e mesun momento cu mi ta admirando e forma mahestuoso cu e bestia tabata bula cu ne, mi ta wak mi colega ta sali core di e porta principal di oficina pasobra e tambe a wak un warawara grandi. E ta keda admirabel pa wak cu cuanto trankilidad y confiansa e animal aki ta span su halanan y laga e biento carg'e. Mi por imagina mi cu e no tin ningun duda cu si e habri su halanan so, e biento mes ta haci tur e resto di trabou. Pakico mi ta pensa asina? Ta pasobra mi por a ripara kico e warawara tabata mas ocupa cu ne. E tabata bula ta wak abou ta buscando cos di come. Tambe mi por a ripara cu e no tabata perde balans den e biento cu tabata supla y e no tabata bula ta wak si su halanan ta na ordo y por haci e trabou.

Den mi mes mi a pensa cu kizas ta pesey hende ainda no ta bula di nos mes. Pasobra e ta tuma hopi confiansa den algo cu nos wowo no ta wak pa lag'e carga bo aya riba na halto, cu tur chens di por kita cay y dal bo curpa duro y toch haci'e. Awo, bo lo pensa: "Si, pero e warawara tin hala y ami no". Bo tin rason, sinembargo, cuanto habilidad nos no tin y ta duda of falta di confiansa ora cu nos djis tin cu laga e invisibel carga nos?

Bo sa kico mi ta kere ta e secreto di e warawara, su habilidad di biba den e presente, den e awo? E triki pa bula y laga bida carga bo ta siña biba cu tur bo atencion mental na aki y awo. No na kico a yega di pasa, kico por bay pasa of analisa pakico e cos a pasa y kier compronde,  pasobra e pensamentonan ta loke ta corta e biento y ta stroba e invisibel di carga bo. Ban confia mescos cu e warawara y ban domina nos pensamentonan pa keda enfoca riba e presente, djis e momento aki, y ban disfruta di e biahe mahestuoso di exito y felicidad. Cordando semper di keda stima y yuda na beneficio di un y tur. Saludos.

Articulo publica originalmente 19 februari 2013.

UPDATE: si bo ta interesa den join nos pa Falun Dafa, por fabor tuma contacto cu nos na Moreu Facilitation 5889920. Participacion ta gratis!

 

Add comment

Comments

  • No comments found