Na september ultimo, riba un diasabra, dia 26, un baby nobo a nace. Un baby cu sabiduria.
Awor, nos ta encarga pa duna e baby aki nutricion. E unico cuminda cu e baby aki por digeri ta amor di berdad, amor puro, liber di tur interes personal. Amor cu ta dedica su mes na e bienestar comun y e interes di e totalidad. Durante un evento special cu mester a tuma luga originalmente, en persona na Tamilnadu, India; pero mirando e situacion actual na mundo, a dicidi pa haci e evento aki un reunion grandi y virtual. E evento special aki di India a lanta den cada participante un amor profundo, un dicha inigual cu pa hopi tempo, of por bisa kisas nunca a ser conoci den e scol di Energia Universal. Mas cu 350 participante di 17 pais cu un total di 204 conexion durante e webinar, cu traduccion den 7 diferente idioma, a bini hunto pa studia, practica y aplica na bienestar di humanidad. Temanan profundo di spiritualidad a wordo papia libremente. No tabata tin diferencia di nivel, ningun clase di discriminacion. Tabata tin un total di 81 conexion virtual di famianan, kende a sinta hunto y nutri nan alma. E resultado di e evento exitoso aki tabata cu e participantenan, panelista, traductor y tecniconan, tur a keda pidi pa mas. Mas eventonan pa clarifica duda y inquietud den temanan spiritual. Mas eventonan pa bini hunto. P’esey, riba 24 y 25 di oktober, nos a bini bek masalmente cu mas di 300 participante di 17 pais pa un total di 179 conexion durante e webinar, cu traduccion den 6 diferente idioma. Den e ocasion aki, no solamente a trata pregunta y respuesta cu a keda pendiente riba temanan spiritual, sino tambe a probecha pa duna danki na e Ancestro di Humanidad y honra e Soldaatnan Desconoci, di ful mundo, di tur tempo.
E dos eventonan aki ta demostra cu e scol di Energia Universal a yega den un era di colaboracion na nivel internacional. E “man invisibel” a scoge dos dama cu a sa di wanta e entusiasmo di e enseñansa aki bibo den nan region. E mesun manera cu Master Dang a sa di haci prome cu e la transforma su curpa den energia. Nan dos, hunto cu e presidente di e Facultad di EHU, a sa di entrega un evento virtual rico na sabiduria y iluminacion. Pa awor, e plan ta pa dedica un dia mas pa duna danki na e Ser Supremo, y bin hunto pa contesta e ultimo 40 pregunta cu a keda pendiente. Asina nos ta culmina cinco dia di mas di 150 pregunta di studiantenan di Energia Universal di ful rond di mundo. Cinco dia di genera un energia di dicha den e aire di humanidad den un tempo cu tin mas mester di esaki.
Esaki ta e momento di cambio, y manera cu Master Dang a siña nos: “Ora e tempo ta corecto, cosnan ta cambia.” Bonbini na un era nobo di Energia Universal.
Clik aki pa check out e pagina di MEL Aruba riba e website nobo di HUE FACULTY.
