Core, cana, gatia of hinkel pero sigui padilanti!

Manera ya ta conoci, nos isla y mundo henter a sufri un impacto inespera relaciona cu e Coronavirus of COVID-19. Tur e sucedido aki a pone nos tur y humanidad enfrenta hopi cos cu pa hopi tempo nos tabata core di dje. Algun di nos mester a para keto, mientras nos tabata custumbra na hopi movecion. Algun di nos mester a pasa tempo cu famia, mientras nos tabata custumbra na traha of comparti cu amistadnan den nos bida social. Algun di nos mester a siña den corto tempo traha completamente dependiente di tecnologia, y algun a realisa cu nan vocacion por a nifica bida y morto…di anochi pa mainta. Con cu nos por a experencia esaki, cada un den su manera, locual nos por saca afo ta cu nos a bin ta core. Core duro den bida…pa bida…di bida. No tin nada malo cu core, si bo sa unda bo ta bay. Sinembargo, si nos a perde bista di nos destinacion, lo mas sabi pa haci ta baha velocidad. Enbes di core, cana. Wak bon unda bo ta. Wak con bo a yega akinan y reevalua unda bo ta bay sigui awo. Si ora bo ta cuminsa cana bo ta ripara cu bo no ta ekipa pa sigui padilanti, baha velocidad un tiki mas y sa cu ta OK pa gatia.

 

Na Moreu Facilitation & Healing Center, nos tabata contento di realisa durante e periodo di incertidumbre aki cu nunca antes humanidad a experencia cu ta importante pa sa unda bo kier yega y pa haci’e riba mas cu un pia, si tin mester. Nos a tuma un curashi durante e periodo aki pa bula completamente den locual cu ta haci e programanan di nos Online Radio via e medio di Live Streaming. Esaki a nifica tecnologia nobo. Espacio pa haci fout y siña di nan. Pero tambe e la habri oportunidad pa yega na un audiencia mucho mas grandi. Cu esaki nos ta hopi contento di por sigui sirbi cu e regalo di nos bos. Tambe nos a ripara, cu maske nos no por pone man riba hende, nos por a sigui tin un contacto mas aya cu lo fisico y sigui duna alivio caminda cu tin mester, na esnan cu tin mester.

Pa dos luna y mey, na Moreu Facilitation & Healing Center, nos a bay di core pa cana, cana pa gatia y despues di gatia nos a cuminsa hinkel riba un pia Online. Nos a ofrece nos programanan di radio via Live Streaming, nos a duna diferente workshops Online via Zoom y nos a sigui cu consulta y Coaching tambe Online, via Zoom. Danki na e medionan aki, nos por a sigui padilanti. Pa e motibo ey, nos no ta bay para di ofrece servicionan Online, pasobra ta danki na hinkel nos ta lanta para, cana y ta cla pa core bek den un direccion mas fihamente defini.