Bishita na barancanan di Ayo
Hits: 1644

Recientemente, nos a bishita e barancanan di Ayo riba un bunita atardecer wardando e luna yen mustra su cara. E tabata un atardi ameno cu nos por a disfruta di sinta hunto y dialoga. Nos a tuma e oportunidad pa practica un poco e arte di contempla. Esaki ta ora bo ta sinta cu bo wowonan habri y bo ta bay pone atencion riba un punta den naturalesa, e zonidonan, e biento, y calma tur actividad di bo mente.

Nos a logra disfruta di e silencio, cual no tabata ful keto, pasobra e zonidonan di naturalesa tabata hopi presente. Despues di a contempla, nos a dicidi di haci un meditacion cu ta un tecnica ainda mas intenso na domina e mente pa stop tur pensamento. E espacio y e barancanan tabata sinta manera cu nan a coopera cu nos pa alcansa esaki. E lugar mes tabata laga bo sinti manera cos cu e ta hopi agradecido y feliz di haya bishitantenan cu ta bin hasi uzo di dje pa un proposito mas halto, buscando un conexion real.

Mas cu uno di nos por a experiencia e sentimento di gratitud aki nan cu e barancanan, matanan, biento y espacio di Ayo Rock Formation tabata transmiti.

Kisas ta bira ora pa nos cuminsa saca tempo pa conecta bek di e forma aki cu naturalesa, muy en especial cu espacionan manera Ayo Rock Formation. E ta keda semper un misterio con e barancanan aki a yega eynan. Kisas nan por tin algo pa siña nos. Ban cuminsa laga los di e comfortabilidad di nos casnan, di e television, tecnologia, y bishita e barancanan aki cu tam as cu dispuesto pa guia nos na haya nos mes bek.

Articulo publica originalmente na Augustus 2013

Add comment

Comments

  • No comments found