Abo a yega di tin un dia cu di mainta cu bo lanta, pa ningun motibo particular, bo ta sinti manera cos cu nada no kier cana? Pami esey ta “No man’s land” of kisas mi tin cu yam’e “No woman’s island” den mi caso.
Di mainta cu mi a lanta mi ta sinti manera un ansha, manera cos cu e aire ta pisa y mi pulmonan ta rechas’e. Ora cu mi curason ta bati, e ta sinti mescos cu un auto cu tin cu subi un sero, pero mi a lubida di cambia speed, pesey e auto ta forsa y ta manera cos cu e no ta bay niun caminda.
Awo, ami ta un persona cu di mainta trempan mi ta cuminsa mi dia cu tur mi rutinanan positivo. Pami no ta wega; mi no por warda te ora cu mi lanta un dia den “No woman’s island” pa e ora mi tene na algo. Asina cu mi lanta, tur dia mi tin mi practica di meditacion, calma mi mente, pone atencion riba mi pensamentonan y riba biba mas den e momento y e presente. Tambe mi ta haci mi mes util y duna mi bida proposito, door di ta un instrumento pa transmiti energia di amor y sanacion.
Tur esaki ta cosnan cu tur dia mi ta practica, sin falta. Pa awo, mi ta consciente cu mi ta sensativo pa energia. Esey ta nifica cu asina cu tin algun cambio den e energia di e atmosfera, den e energia di mi medio ambiente, den e consciencia colectivo of simplemente un combinacion di tur factornan cu mi a menciona y cu esakinan ta sosode net na un momento cu ami mes tambe ta pasando den retonan, mi ta end up ta sinti den “No man’s land”. E ta un sentimento di ta manera perdi, kizas un sentimento hopi egoista, si ma wak e bon.
Mirando cu e sentimento aki ta uno cu ta enfatisa separacion y no unidad. Dianan cu mi ta lanta asina ta dianan cu mi kier ta mas bezig cu mi mes, tin biaha te hasta e ta bira dificil pa mi por funciona optimal den mi trabou, ja cu mi trabou ta cu hende y no cu mashin.
No Woman’s Island
@MentePositivo
Un otro cos cu mi ta ripara di mi dianan den “No woman’s island” ta, cu mi ta hopi mas pendiente di mi curpa y con mi curpa ta sinti. Ta manera cos cu tur dolor ta lanta den mi musculo, weso y areanan caminda tension ta laga sa cu e tey, manera mi nek, schouders y lomba. No tin mucho cos cu ta traha pami riba dianan asina, y cu tempo mi a bin realisa cu ta miho mi avisa na esnan di mas serca dimi, cu ta mi coleganan y famia, cu mi ta sintiendo, manera cu mi ta sintiendo.
Cosnan djis ta manera cu nan ta y pa bay trankilo cu mi pasobra mi ta trahando riba dje. Di un banda, e ta traha miho pa haci esey, ja cu mi tin e suerte di tin coleganan y famia cu tambe a haci esfuerso pa desaroya nan mes un poco. Locual ta pone cu nan ta mas dispuesto pa apoya mi y haci e peso di e dia un poco mas lihe.
Un cos si, sa tin dianan cu mi ta asina profundo den “No woman’s island” cu ni esey no ta yuda. Mi ta laga sa si cu mi ta aprecia e pasenshi y comprension, sinembargo e unico cos cu ami ta ripara ta traha ora tur otro instrumento a faya, ta djis bay drumi.
Si.
Bo a lesa bon.
Mi ta pone mi mes drumi.
No ta importa con trempan. Mi no ta ni sende television of busca pa wak algo riba mi tablet of telefon. Mi ta djis bay drumi ora cu e energia den mi of rond dimi (of tur dos) ta bira dimas. Mi nervionan ta altera y mi mester primi e boton pa reset. Drumi ta haci esey pami. Por lo menos, mi no ta pensa mas, no conscientemente anto. Y tampoco mi no ta asina bezig cu mi curpa y con e ta sinti ora mi ta drumi. Ta manera e ta duna mi alma un chens pa organisa cosnan netjes atrobe.
Si abo a yega di cay den “No man’s land” of “No woman’s island”, kizas djis bay drumi por ta un conseho cu lo traha pa bo tambe. Y si abo ta haci algo otro, kizas pa medio di e blog aki bo por laga mi sa. Sigur mi lo aprecia. Manera ora mi ta bisa cu mi ta trata diferente instrumentonan pa “switch” con mi ta sinti, mi no kiermen solamente ehercicionan di “mental training” of di respiracion; tambe mi sa bula riba trampolin, landa of cana den naturalesa, y nada, simplemente nada, no kier traha tin biaha. Of e sa sosode tambe cu mi sa bon ki pa haci pero mi mes ta stroba mi mes of pone obstaculo pa haci’e. Sea cu mi ta lanta floho of mi ta bisa cu a bira scur caba mi no ta bay cana y cu mi no ta bay cana pasobra eyfo tin boa, of cu mi curpa ta dolor y mi no tin smaak di haci ehercicio fisico. En todo caso, mi ta kere bo a compronde kico mi kiermen.
Na otro banda, kizas e no ta egoismo, kizas e no ta un sentimento di separacion y cu ta hustamente e hecho di ta sinti den unidad cu tur cos y cu e unidad ey ta den movecion, transicion of den un momento di cambio…kizas ta hustamente esey ta locual ta sacudi mi mundo tanto asina. E ora, mi lo tin cu bisa mi ta den “No woman’s island”? Of ta mas miho pa mi bisa mi a lanta awe den “All men and women’s land”?
Con cu bay bin, ban djis keda stima y yuda.
Saludos.
