Un diasabra despues di Falun Dafa nos a dicidi, riba invitacion di un di e participantenan, pa bay desayuna ariba rif. Di Nikky Beach nos a subi nos auto y bay direccion di Barcadera. Algun di nos ainda mester a pasa cas regla un ke otro, pasobra nos no ta mesun liber manera nos a kere cu nos ta.

Asina mes mayoria di nos a logra di un manera espontaneo di reuni na pier na Barcadera pa subi un boto di piscado. E boto no tabata mucho grandi pero esey tabata tin pa crusa e pida lama y bai riba rif. Ora bo ta haci cosnan asina, bo ta ripara cu tur bo atencion ta na e presente so. Na wanta bo balanse pa no cay di e boto, na wak tur cos cu wowonan diferente, manera un mucha chikito, pasobra esaki tabata algo cu hopi di nos no a haci den hopi tempo, kizas nunca.

E bista y e paisahe tabata laga bo sin rosea. Tur cos tabata mas bunita, e casita rustico, e hamaca y e naturalesa cu hende no a logra mishi cu ne mucho ainda. Un beyesa simpel. Nos a desayuna, nos a landa den a awa cristalino, nos a combersa y comparti conscientemente, nos a explora, nos a sinta keto y reflexiona y nos a keda pa come pisca fresco cu nos mannan te merdia.

Pa algun di nos, ya tur obligacion a keda atras y nos a keda disfrutando di e esencia di bida, e paz, e dicha di ta bibando un bida simpel, pero asina yen.