Nos a yega comienso di un aña nobo y probablemente bo a dicidi di pone algun di bo metanan como prioridad pasobra ta aña nobo, bida nobo… Metanan, por ehempel manera; bay haci gymnastiek tres biaha pa siman, come saludabel y purba medita 10 minuut cada dia.
Na comienso e ta un tiki difícil pa drenta den e rutina, pero eventualmente bo ta gara un bon custumber. Te dia cu algo den bo rutina cambia anto diripiente bo a perde e smaak pa sigui cu bo meta… Bo a yega di puntra bo mes dicon e ta difícil pa wanta bo mes na bo metanan durante ful e aña? Well, ta pasobra bo enfoke ta demasiado superficial.
Un meta ta un resultado anhela cu abo ta desea pa obtene den futuro mientras cu un intencion ta manera un tema scohi pa alinea den bo bida. Den otro palabra; e ta un guia principal pa ken abo kier ta y con abo kier traha, biba y aparece awor den e mundo aki.
Ban bisa cu bo meta di aña ta bay ta pa core ful un marathon. So, bo ta cuminsa train duro p’e y come hopi saludable. Despues di varios luna ta train, e dia finalmente a yega pa haci e marathon. Despues di tur e trainingnan ey bo a logra, y cu un tempo más liher cu bo a pensa. Tremendo!! Bo ta sinti bo mes bon pa un par di día anto después bo ta bolbe puntra bo mes: “Hmmm, kico awor?” Esey ta paso bo ta sinti un bashi paden, paso bo meta a yega na su final.
Esey ta e “problema” cu pone un meta. E ta un logro hopi cortico stipula, e no tin chens pa evoluciona y cambia mesun cos cu bo bida ta constantemente cambiando.
Un intencion ta diferente, ban bisa cu bo kier a pone bo intencion pa ta saludabel. E ora ey den cada momento bo lo tin cu bay dicidi si kico abo ta haciendo ta considera bo intencion di ta mas saludabel.
Cumpra e paki di chuculati na supermarket? Miho no.
Bay cana 30 minuut awe después di trabou? Si!
Pero esey no ta stop na salud fisico, tambe pensa riba bo salud mental. Miho cuminsa tuma 10 minuut pa medita paso mester transforma tur e pensamentonan negativonan di henter dia. Abo tin cu constantemente adapta bo bida pa e ta alinea cu bo intencionnan. Kinan bo por wak tambe cu si bo pone un intencion pa bo mes,e nunca no lo yega na su final y pesey bo nunca no lo sinti un bashi tampoco.
So, ban cuminsa e aña nobo aki enfocando nos atencion riba cosnan mas “long-term”; riba un intencion cu bo kier crea pa bo mes den cada momento cuminsando awor!
[learn_press_profile]
