Pone atencion un rato y check den ki tono bo ta papiando cu bo mes. E ta un tono suave? Constructivo? Of bo ta siendo firme y kibrando cu bo mes?
Mayoria hende kier stima nan mes, sinembargo nan ta papia di un forma hopi rigido cu nan mes den nan cabes. Unda nos a siña papia cu nos mes den nos cabes? Bo ta kere un baby di menos cu 1 aña ta pasa su dia ta papia cu su mes den su cabes? Ami no tin contesta pa e pregunta aki. Lastimamente un baby di menos cu 1 aña no tin e habilidad pa contesta e pregunta aki tampoco. Ora di observa e comportacion di un baby asina, mi por conclui cu e contesta ta no. E ta parce cu un baby ta completamente involucra den locual ta sosode su dilanti, den e momento. Si ta pa prome biaha e ta scucha un zonido, e ta captiva su atencion totalmente. Mi ta duda cu e lo tin atencion pa scucha su mes bisa: “Ta ki zonido esaki ta?” E baby aki, no ta keda asina pasobra mescos cu ne, esnan den su ambiente tambe a scucha e zonido y kisas lo a grita: “Baha e volumen! E cos ey ta zona mucho duro.” Aki e baby ta cuminsa graba e tono di duna ordo, e tono firme y rigido cu despues ora e mes madura lo bira su propio dialogo interno.
Ora bo scucha e tono aki den bo mes, sea consciente cu locual ta impacta intonacion ta e forsa y energia den dje. Pa abo por papia amoroso y cariñoso cu bo mes, siña cambia e forsa y energia den e tono di bo bos interno. Asina bo ta siña papia amoroso y cariñoso cu bo mes. Esaki ta e forma di stima bo mes di berdad.
