Candela!

Un diadomingo atardi nos a dicidi di bay den un pida mondi ariba un tereno priva y traha un candela pa nos sinta serca di dje y mientras cu e ta kima, nos por a comparti nos pensamentonan, ideanan y sentimentonan cu otro. Pensamentonan tocante bida, spiritualidad y pakico nos ta sigui tur dia den e esfuerzo di mehora nos mes, e esfuerzo di kier stima y yuda ken cu crusa nos caminda.

Nos a conta storianan y anecdotanan chistoso y mescos cu e vlamnan di e candela tabata bay halto, mescos por a sinti e vlamnan den nos curason ta fomenta un calor cu ta brasabo di paden. Esaki ta plenitud.

Comparti pafo sinta den naturalesa, cu solo bahando y, de bes en cuando, hala un rosea profundo pa sinti cu di berdad e momento ta berdad. E no ta un soño, maske cu tur cos tabata parce demasiado perfecto. Asina bida ta, bida no ta falta nada y ora bo saca tempo pa biba bida di berdad, bo ta pone atencion ariba cuanto cos bida tin pa ofrece. Wak tur cos, scuch’e, sinti’e, hol’e, smaak e. Sinta na banda di e candela nos a realisa e perfeccion den tur creacion.

E candela a kima totalmente sin reserva, sin limitacion. E tabata parce bida mes, pasando dilanti nos wowo y na final ta ashi so a keda. Nos por bisa cu e la bale la pena.

Articulo publica originalmente Juni 2013

Add comment

Comments

  • No comments found